Rreziku i tregut – Vlera neto e pjesës në Fond varet nga lëvizja e çmimeve të tregut të letrave me vlerë që janë pjesë e portofolit të Fondit. Rënia e çmimit të letrave me vlerë mund të çojë në uljen e vlerës së portofolit të Fondit dhe të kthimeve të realizuara, dhe anasjelltas, rritja e çmimit të letrave me vlerë mund të çojë në rritjen e vlerës së portofolit dhe të kthimeve. Për t’u mbrojtur nga rreziku i tregut, Shoqëria do të punojë për ta minimizuar atë përmes diversifikimit të portofolit, sipas parimit të shpërndarjes së rrezikut.

Rreziku i normave të interesit – Ndryshimi i normave të interesit mund të ndikojë pozitivisht ose negativisht në vlerën e aseteve të Fondit, pasi pjesa më e madhe e mjeteve do të investohet në letra me vlerë borxhi dhe depozita pranë bankave të autorizuara në Republikën e Maqedonisë së Veriut. Ndryshimi i normave të interesit është në mënyrë të kundërt proporcional me ndryshimin e çmimit të letrave me vlerë borxhi. Ndjeshmëria e letrave me vlerë afatshkurtra, si rregull, është më e ulët krahasuar me letrat me vlerë afatgjata. Për ta zvogëluar këtë rrezik, Shoqëria do t’i investojë mjetet e fondit në instrumente borxhi afatshkurtra dhe afatgjata.

Rreziku kreditor – Rreziku kreditor është probabiliteti që emetuesi i një letre me vlerë të caktuar të mos jetë në gjendje, plotësisht ose pjesërisht, të përmbushë detyrimet e tij në momentin kur ato bëhen të kërkueshme. Mospërmbushja e detyrimeve nga emetuesit do të kishte ndikim në likuiditetin dhe do të zvogëlonte vlerën e Fondit. Shoqëria do ta minimizojë këtë rrezik duke ndjekur cilësinë kreditore të emetuesve.

Rreziku i likuiditetit – Rreziku i lidhur me likuiditetin është probabiliteti që Fondi, në një moment të caktuar, të ketë vështirësi në sigurimin e mjeteve për të shlyer detyrimet që lidhen me tërheqjen e pjesëve nga Fondi, si rezultat i pamundësisë për të shitur shpejt asetet financiare me një çmim afërsisht të barabartë me vlerën e tyre reale. Shoqëria do ta menaxhojë rrezikun e likuiditetit duke investuar në letra me vlerë me likuiditet sa më të lartë.

Rreziku valutor – Rreziku valutor është një formë rreziku që paraqitet me ndryshimin e çmimit të një valute kundrejt një tjetre. Siç sugjeron edhe vetë emri i fondit, ai është kryesisht i denominuar në euro, çka e bën të përshtatshëm për investitorë që duan të shmangin ekspozim më të madh ndaj ndryshimeve valutore.

Rreziku i ndryshimit të rregullave tatimore – Probabiliteti që autoriteti legjislativ, në Republikën e Maqedonisë së Veriut ose jashtë saj, të ndryshojë rregullat tatimore në mënyrë që do të ndikonte negativisht në kthimin e Fondit.

Rreziku politik – Mundësia e krizave të mundshme politike në vendet ku Fondi ka investuar mund të çojë në ndryshim të vlerës së aseteve të Fondit.

Rreziku operacional – Rrezik humbjeje për shkak të proceseve të brendshme të papërshtatshme ose të dobëta, personelit të papërshtatshëm dhe sistemeve të papërshtatshme ose të dobëta, si dhe ngjarjeve të jashtme. Rreziku operacional përfshin edhe rrezikun ligjor, rrezikun e pastrimit të parave dhe financimit të terrorizmit, si dhe rrezikun e papërshtatshmërisë së sistemeve të informacionit në funksionim.