Rreziku i tregut – Vlera neto e pjesës në Fond varet nga lëvizja e çmimeve të tregut të letrave me vlerë që janë pjesë e portofolit të Fondit. Rënia e çmimit të letrave me vlerë mund të çojë në uljen e vlerës së portofolit të Fondit dhe të kthimeve të realizuara, dhe anasjelltas, rritja e çmimit të letrave me vlerë mund të çojë në rritjen e vlerës së portofolit dhe të kthimeve. Për t’u mbrojtur nga rreziku i tregut, Shoqëria do të punojë për ta minimizuar atë përmes diversifikimit të portofolit, sipas parimit të shpërndarjes së rrezikut.

Rreziku i normave të interesit – Ndryshimi i normave të interesit mund të ndikojë pozitivisht ose negativisht në vlerën e aseteve të Fondit, veçanërisht në atë pjesë të mjeteve që do të investohet në depozita pranë bankave të autorizuara në Republikën e Maqedonisë së Veriut. Për ta zvogëluar këtë rrezik, Shoqëria do të depozitojë mjetet e fondit në periudha të ndryshme kohore deri në maksimum një vit.

Rreziku kreditor – Rreziku kreditor është probabiliteti që emetuesi i një letre me vlerë të caktuar të mos jetë në gjendje, plotësisht ose pjesërisht, të përmbushë detyrimet e tij në momentin kur ato bëhen të kërkueshme. Mospërmbushja e detyrimeve nga emetuesit do të kishte ndikim në likuiditetin dhe do të zvogëlonte vlerën e Fondit. Shoqëria do ta minimizojë këtë rrezik duke mos investuar në portofolin e Fondit në letra me vlerë borxhi (obligacione).

Rreziku i likuiditetit – Rreziku i lidhur me likuiditetin është probabiliteti që Fondi, në një moment të caktuar, të ketë vështirësi në sigurimin e mjeteve për të shlyer detyrimet që lidhen me tërheqjen e pjesëve nga Fondi, si rezultat i pamundësisë për të shitur shpejt asetet financiare me një çmim afërsisht të barabartë me vlerën e tyre reale, kryesisht për shkak të kërkesës aktualisht të pafavorshme në treg. Shoqëria do ta menaxhojë rrezikun e likuiditetit duke investuar në letra me vlerë me likuiditet sa më të lartë.

Rreziku valutor – Rreziku valutor është një formë rreziku që paraqitet me ndryshimin e çmimit të një valute kundrejt një tjetre. Fondi në portofolin e tij mban letra me vlerë të denominuara në valuta të ndryshme dhe ndryshimet e mundshme të këtyre valutave kundrejt valutës vendase mund të çojnë në rritjen ose zvogëlimin e vlerës së pjesëve. Shoqëria do ta zvogëlojë këtë rrezik përmes diversifikimit të portofolit në valuta të ndryshme.

Rreziku i ndryshimit të rregullave tatimore – Probabiliteti që autoriteti legjislativ, në Republikën e Maqedonisë së Veriut ose jashtë saj, të ndryshojë rregullat tatimore në mënyrë që do të ndikonte negativisht në kthimin e Fondit. Rreziku i ndryshimit të rregullave tatimore është tërësisht jashtë sferës së ndikimit të Shoqërisë.

Rreziku politik – Mundësia e krizave të mundshme politike në vendet ku Fondi ka investuar sipas këtij Prospekti mund të çojë në ndryshim të vlerës së aseteve të Fondit. Për t’u mbrojtur nga ky rrezik, Shoqëria do t’i investojë asetet e Fondit në një mënyrë që do të mundësojë sa më pak ekspozim ndaj tregjeve ku krizat politike mund të kenë ndikim më të madh.

Rreziku operacional – Rrezik humbjeje për shkak të proceseve të brendshme të papërshtatshme ose të dobëta, personelit të papërshtatshëm dhe sistemeve të papërshtatshme ose të dobëta, si dhe ngjarjeve të jashtme. Rreziku operacional përfshin edhe rrezikun ligjor, rrezikun e pastrimit të parave dhe financimit të terrorizmit, si dhe rrezikun e papërshtatshmërisë së sistemeve të informacionit në funksionim.